แสนวิตก หัวอกแตกหม้าง
มันเป๋นไผไหน ตัดกั๋มม์เวรข้า
บัดเดียวเดี่ยวนี้ ปี้บ่ได้หัน
มึดฅ่ำจ๋นตา ดาวอยู่ยังฟ้า
คอยดูหมอกเหมย ตกลงแกมผ้า
ผ่อดูดาวจ้าง ล่องใต้เป็นสาย
ปี้กึ๊ดเถิงนาย ปอต๋าเป็นแล้ง
จับใส่ลางวัน เยียะเหมือนจักไข้
ก๋าบ้าร่ำร้อง ปี้มาต๊กใจ๋
ผ่อดาวตังหลาย ยังยายออกพร้อม
ผ่อดาวจ้างหลวง ปกงวงต่องเต้า
ปี้กึ๊ดต๋ามกึ๊ด อยู่ไหนบ่เป๋น
มาง่อมงันใจ๋ พระทัยคั่งแค้น
ดอกงิ้วดอกกวาว บานแดงอ้อมต้อม
จี๋จ้อแม่นก ซ้ำมาสังหรณ์
ผ่อนกตังหลาย จับยายกิ่งไม้
นกเอี้ยงนกเขา ตัวเลาอ้อมต้อม
ฝูงหมู่นกเค้า แขกเต้าก๋าแก๋
ตังคมก็ฟัน ตังสันก็เงื้อ
สะบันงาเครือ หอมเจือแผ่กว้าง
ยามหอมดอกไม้ กึ๊ดไคว่ฮอดหลัง
มโนนึกเถิง เติงยามห่างราง
กำฮักปี้นี้
จักเอาไว้กล๋างวังข่วงคุ้ม
ยามปี้สะดุ้งตื่นเววา |
ผ่อดูดาวจ้าง เข้าผ้าปลอมเหมย
ได้เวทะนา ต่ำคล้อย
สะหรีคิงปัน ไปไหนนอเจ้า
ก็ไหลเมฆผ้า งำเดือน
ไก่ขันเลยมา ซั้นซ้าว
กึ๊ดเถิงเติงนาย อยู่แต้ใจ้ใจ้
ลวดใจ๋บ่ตั้ง สักคืน
มาหนาวเย็นใน นอกฮ้อน
มันตี๋เหล็กไฟ ตังตังม่วนก้อง
ง้อนไถไก่หน้อย ดาววี
ดาวสะเปาคำ ออกโป้น
ใจ๋ตระเวน เปสคนเมาบ้า
หนักหนีบแหน้น คอยถอย
ผืนแผ่นแดงฮอม กิ่งไม้
เถิงเวลาตอน ฮ้องว่าจี๋จ้อ
มาวิดวิ่งเต้น ปาวเฟย
มาแป๋งฮังนอน กิ่งไม้
กับฝูงนกแล ก๋าดำปากเส้า
ปี้หันยิ่งอั้น ไกล๋ซง
ดอกซอมพอแดง ก็นัก
หอมกลิ่นคันธัง รือเต้ากลิ่นแก้ม
เหลือตี้จักอ้าง จานาย
จักเอาไว้ในน้ำก็กลั๋วหนาว
ก็กลั๋วเจ้ามาปะใส่ แลลู่เอาไป |
สายตี้แปงเอย
ปี้กึ๊ดเติงหา น้ำต๋าปอย้อย
กั้นต๋าวันแลง ก็เตียวออกเข้า
ปี้กึ๊ดต๋ามกึ๊ด ปอใจ๋เสลือน
ผ่อดาวประก๋าย ขึ้นมามะม้าว
เหมือนเอาหินผา ตอกยัดเข้าใส้
เอาผ้าห่มตุ๊ม ปอจุ้มตึ้งผืน
ฝูงนกเค้าเหมย ก็แค้งมาฮ้อง
นกเอิดเถิดเหย ร่ำเลยจ้องจ้อง
ผ่อดาวจ้าง ยองห้อยมายสี
เดิ๊กมาแล้วเหย เหมยตกซะซั้น
หลอนเถือนดู เดือนสามสี่ห้า
แหงนผ่อปล๋ายไม้ หล่นใบสอยสอย
ปี้หนีไกล๋ซง เข้าโขงป่าไม้
ปี้มาหมองใจ๋ พระทัยหลายข้อ
ตระเหว่าแม่นก เป๋นเปื่อนเก้าเหมย
ยามต๋าวันแลง บินมาสอดไซ้
หมองใจ๋แต้นา ยามกึ๊ดฮอดเจ้า
แม่จี๋ดอกป้าน เปื่อนบ้านเต๋มโขง
จาติดอกเกี๋ยงเหมย หอมเลยแต้ตั๊ก
ซะลาบดวงทัย อุ่นไอฮ่างแอ้ม
ยามเนตรนองน้ำ อาบแก้มเป็นสาย
จักเอาไว้ปื้นอากาศกล๋างหาว
จึ่งเก็บเอาไว้ในอกในใจ๋ปี้นี้ |
ปี้บ่หันหน้า
บ่มีหว่างแห้ง สักวัน
ผ่อหาโนชา วาดว้า
ปี้ผ่อดูเดือน กึ๊ดเติงน้องหล้า
หันผีปุ้งส้าว เป๋นลาย
จักกลืนลงไป ก็แก้น
ต๋ายตึ้งบ่ลืม กันปี้บ่ได้
เสียงสนั่นก้อง ครางใน
ใจ๋ปี้มัวเมา เอ่าฮ้อน
ดั่งปรหัสสดี ใสงามบ่เส้า
หนาวใจ่หน้อย คิงเย็น
เถือนดูมา เมื่อแล้ง
ผ่อม่อนปูดอย เป๋นควันแวดอ้อม
เมื่อสายแดดไหม้ เติงตอน
ย้อนใจ๋อาลัย น้องไธ้
ชู่คนป้อเฮย บินเสยร่ำถ้อง
เซาะกิ๋นเหยื่อหย้า ซอแซ
กึ๊ดเถิงนายเลา น้องเจื้อ
มะลิลาดง หอมผายทั่วบ้าน
จักไขบอกหื้อ นายฟัง
เดิ๊กมาคืนแฮม น้ำค้าง
จุ่งกึ๊ดฮอดจาย ตี้หมายอยู่ถ้า
ก็กลั๋วเหมยซ้อนดาวลงมาคลุม
เอาไว้หื้อมันไห้อะฮิ อะฮี้ |
